TIRANË– Hotel ‘Rogner’ në Bulevardin ‘Dëshmorët e Kombit’ në Tiranë është kthyer mbrëmjen e djeshme në një skenë krimi. Ajdin Mustafi 28-vjeç humbi jetën pasi ra nga kati i pestë. Report Tv ka siguruar foton e të riut, shqiptar i Maqedonisë së Veriut, vdekja e të cilit është e mbuluar me mister. Ajo çfarë u raportua ishte se 28-vjeçari ka qenë i mbështetur në dritare dhe janë këputur hekurat e ballkonit, e për pasojë ka rënë nga kati i pestë.
Qytetarët e tjerë që kanë qenë duke pushuar në këtë hotel kanë parë skena tmerri, të ngjashme me ato të filmave, pasi trupi i të riut u gjet në dysheme, në pjesën e anësore të oborrit, me pamje nga Bulevardi. Pranë trupit të tij është gjetur dhe zgara mbrojtëse të ballkonit. Ajo që të bën të ngresh pikëpyetje se si në një hotel që klasifikohet ndër elitaret në kryeqytet, si ka mundësi që të ketë mbrojtëse metalike të pafiksuar mirë.
Kur kanë kaluar vetëm pak orë nga kjo vdekje, gjurmët e saj ngjarjeje janë ende të freskëta. Ballkoni i dhomës ku po qëndronte 28-vjeçari nuk i ka kangjellat e vendosura, krahasuar me dhomat e tjera. I riu ishte shqiptar i Maqedonisë së Veriut dhe kishte dy ditë që kishte ardhur në Shqipëri nga Zvicra. Ai kishte edhe shtetësi shqiptare dhe zvicerane dhe punonte në një kompani transporti kosovare, e cila merret me transport asfalti dhe materialesh të tjera. Në dhomë nga sa është mësuar, rrinte i vetëm, pa të dashurën, gruan apo ndonjë shok. Lidhur me këtë ngjarje kanë nisur hetimet ndaj administratorit të hotel ‘Rogner’ dhe përgjegjësit për mosrespektimin e rregullave të sigurimit teknik.