Deri tani PS dhe LSI kanë 74 vota diferencë/ Nesër rinis numërimi i kutive të mbetur në qarkun e Beratit

Rinumërimi nisi rreth orës 14:00 të ditës së sotme dhe u mbyll në mbrëmje ndërsa do të vijojë edhe ditën e nesërme që prej orës 09:00 të mëngjesit.

Nga 114 kuti votimi që duhet të hapen në total, vetëm 46 janë rinumëruar deri tani dhe rezulton se diferenca mes PS dhe LSI është 74 vota, ndërsa më parë ishte 77 vota.

Në qendrën e votimit 33 dhe 32 u kontestuan dy fletë votimi, një prej të cilave është konsideruar e vlefshme për subjektin PS, ndërsa një tjetër është konsideruar e vlefshme në favor të LSI-së.

Në qendrën e votimit 3458/1 janë kontestuar katër fletë votimi, 2 prej të cilave janë konsideruar të pavlefshme, ndërsa 2 të vlefshme për subjektin PS.

Ndërsa në tavolinën nr 3 në qendrën e votimit 3345 rezultuan 3 fletë votimi, të cilat KZAZ i ka vlerësuar të vlefshme për PS, por KAS vendosi që njëra të shpallet e pavlefshme.

Në tavolinën 8 në qendrën e votimit 3340 janë konstatuar dy fletë votimi të vlefshme, një për PS dhe një për PD. Pas vlerësimit, KAS i konsideron të vlefshme për të dyja subjektet.

Ndërsa në tavolinën numër 7, u konstatuan dy fletë votimi që u cilësuan të vlefshme për PS.

Kujtojmë se me shumicë votash, KAS vendosi rinumërimin dhe rivlerësimin e 114 kutive të votimit të Qarkut Berat.

LSI në kërkesën fillestare kërkoi hapjen e 114 kutive të votimit, por më pas kërkoi rinumërimin dhe rivlerësimin e 277 kutive të të gjithë qarkut të Beratit. PS mbështeti kërkesën e parë për 114 kutitë duke nënvizuar se nëse do të ketë ndryshim rezultati nga rinumërimi i këtyre kutive, do të rinumërohen të gjitha.

Një ditë më parë KAS vendosi me shumicë votash të anëtarëve që të rrëzojë kërkesat e PD dhe LSI për shpallje pavlefshmërie në Berat dhe Gjirokastër. Në lidhje me ankimimet për Qarkun Berat administrata e KQZ shqyrtoi materialet zgjedhore për 24 kuti për këtë qark, për të gjetur parregullsi me kërkesë  të LSI-së.

Artikuj të ngjashem

Instagram

Më të lexuarat